Alfa Romeo: Погледнете ја внатрешноста на новата Giulia

Alfa Romeo вчера го откри изгледот на својот нов седан Giulia, но остави уште многу непознати детали. Една од работите што остана тајна беше изгледот на внатрешноста на автомобилот, но денеска се појави фотографија која покажува како ќе изгледа новиот модел од перспективата на возачот и патниците.

Контролната конзола е фокусирана на возачот, а во централниот дел доминира екранот од мултимедијалниот систем. Интересно е дека инструментите за брзина и за вртежи на моторот се аналогни, а невообичаена е и позицијата на копчето за стартување на автомобилот кое е сместено на управувачот.

Италијанската компанија веќе најави дека ќе користи врвни материјали за внатрешноста, но дополнително треба да ги открие разните комбинации кои ќе бидат достапни за купувачите. Моделот што е на фотографиите има комбинација од црна кожа, алкантара и црвен конец.