Исповед на сопругата на Ален Ризвановиќ: Бев робинка, без него и свекрвата не смеев ни во дворот!

Мојата работа беше само да готвам, да чистам и да внимавам на децата. Ме тепаше по рацете и нозете, дури и кога бев бремена. Надвор не смеев да излегувам без него или неговите мајка и татко, вели Елена Ризвановиќ.

"Сакаше да бидам робинка која ќе му раѓа деца", рекла пред камерите на Австрискиот јавен сервис ORF 26-годишната Елена, сопруга на напаѓачот од Грац, 26-годишниот Ален Ризвановиќ.

"Мојата работа беше само да готвам, чистам и да внимавам на децата. Ме тепаше секој ден, по рацете и нозете, дури и кога бев бремена. Надвор не смеев да излегувам без него или неговата мајка. Можев да излезам и кога неговиот татко беше надвор. Се чувствував како затвореник, без никакви права, ми ги одзема и мобилниот и пасошот", вели Елена.

Таа и Ален се запознале преку интернет. Ѝ праќал прекрасни љубовни пораки, а таа пред четири години од Босна се преселила кај него во Карсдорф кај Грац. Веќе од првата година од бракот тој станал насилен.

"Инсистираше да носам марама, а еднаш во Босна впери пиштол во мене и ми се закани дека ќе ме убие и ќе ме фрли во река. Се закануваше дека ќе плати некој да ги убие брат ми, татко ми и мајка ми", рекла Елена со солзи на лицето.

Кулминацијата на насилството се случила кога побарала развод. Тогаш ја тепал најбрутално, сè додека не ѝ се јавила на својата мајка, која го пријавила во полиција. После тоа, Ален морал да се пресели и му бил забранет пристап до семејството. Елена со синовите заминала во безбедна куќа.

Три седмици подоцна Ризвановиќ го извршил масакрот во центарот на Грац, кога со својот автомобил и нож усмртил три лица и повредил уште 34.

"Многу ми е жал поради тоа што го направи. Сега само сакам со децата да заминам на безбедно", рекла Елена.