Од зградата на градската организација на СДСМ, која се наоѓа само на неколку метри од централата на ВМРО-ДПМНЕ, Жерновски со своите сопартијци и поддржувачи, возбуден и среќен, се упати кон улиците на општина Центар, за да ја прослави победата со своите сограѓани кои и по трет пат убедливо му ја дадоа поддршката.
- Мојата победа е изборена по трет пат со тоа што во првиот круг противкандидат на граѓаните им беше Владимир Тодоровиќ, во вториот круг Никола Груевски, а денеска противник на власта и беше народот. Оваа победа е јасен доказ дека волјата на народот насила никој не може да ја смени . Многу му благодарам на лидерот на СДСМ, Бранко Црвенковски, чии драгоцени совети доведоа до оваа наша заедничка победа - изјави Жерновски кога ги дозна резултатите од прегласувањето, според кои извојува победа од повеќе од 3.000 гласа од својот противкандидат од владејачката коалиција, Владимир Тодоровиќ.