Владата обезбеди 15 милиони евра за отворање на микро и мали претријатија во руралните средини. Целта е да се создадат услови за економски развој и за отворање на нови работни места во руралните средини.
Овие средства Владата ќе ги даде за поддршка за отворање на компании во областа на земјоделско производство, алтернативно земјоделско производство, занаетчиство, туризам и услужни дејности.
-Владата обезбедува 50 отсто од трошоците за самата инвестиција. Доколку почетната инвестиција изнесува 3.000 евра, Владата ќе обезбеди 1.500 евра. Долната граница на инвестицијата ќе биде 3.000 евра, а горната ќе биде од 300-400.000 евра. Со оваа програма убедени сме дека ќе има голем број на вработувања и урбаниација на руралните средини, посочи портпаролот на Владата, Александар Ѓорѓиев.
Тој потенцираше дека доколку има потреба од поголема финансиска помош, Владата е подготвена да обезбеди дополнителна сума на средства за што поголем број на фирми и поголем број на вработувања.
-Направивме посериозни анализи за висината на невработеноста во однос на средината и дејностите. Утврдивме дека најголема невработеност има во руралните средини и во областите земјоделство, туризам и услужни дејности, рече Ѓорѓиев и додаде дека во овие области постои можност за поголема вработеност.
За средствата од оваа програма може да конкурираат трговци поединци, мали и микро претријатија, земјоделски стопанства, замјоделски задруги и ветеринарни станици.
Поконкретно овие средства ќе се даваат за преработка на млеко, месо, овошје, зеленчук, потоа за одгледување на пчели и печурки, како и за дополнителни земјоделски производи. Исто така, ќе се финансира и отварање на откупни центри за земјоделски производи, отварање на автосервиси, фризерски салони, отварање не ветеринарни станици и набавка на земјоделска механизација.
Владата подготвува кампања во која претставници на Агенцијата за финансиска поддршка на земјоделството и Агенцијата за вработување на Република Македониј ќе ги запознаат граѓаните како да ги добијат овие средства, како и за тоа во кои сфери може да се добие поддршка од Владата и помош при изготвувањето на бизнис-плановите.
Основен услов кој треба да го исполнат граѓаните за да добијат финансиска поддршка од Владата покрај бизнис-планот е да ги имаат исполнето обврските по основ на даноци и придонеси, и да се од руралните средини, однодсно од средини со население под 30 илјади жители.
Приоритет во добивањето на средствата ќе имаат оние бизниси кои ќе овозможат поголем број вработувања. Извор на Курир.
