Изборни манипулации се забележуваат на самиот почеток на прегласувањето во општина Центар, соопштуваат од невладината организација „Цивил“ која го следи прегласувањето од локалните избори со 25 статични набљудвачи како и со мобилни кои служат како логистичка подршка и ја следат атмосферата и случувањата на избирачките места.
Оттаму велат дека прегласувањето на вториот круг во избирачките места во општина Центар започнало со нерегуларности и со прекршување на изборниот молк, но и со уникатен обид за манипулирање со гласачите.
„Во текот на минатата ноќ или рано утрово, флаери и писма се оставени во поштенските сандачиња и во влезовите на зградите насекаде низ општината каде што има прегласување, меѓу другите и во зградата во која се сместени канцелариите на Цивил. Во едниот флаер и во писмото, од кое јасно се гледа дека е фалсификувано (кое наводно го пратил другиот кандидат за градоначалник) гласачите се повикуваат да излезат на гласање на 28 април, односно не денеска туку идната недела, а во другиот флаер граѓанките и граѓаните се повикуваат да не излезат на гласање, затоа што ако излезат ќе победел кандидатот од партијата која што, пак ќе речеме, очигледно ги фабрикувала флаерите и писмото“, велат од „Цивил“.
