60 илјади Руси на прошетката во спомен на Немцов во Москва

Колона подолга од два километри поминала од Славјанскиот плоштад преку Москворецкиот мост, до местото на кое беше убиен Борис Немцов, во близина на ѕидините на Кремљ, пренесуваат агенциите.

Учесниците во маршот носеле цвеќиња, руски знамиња со црна лента, знамиња на движењето Парнас, чиј лидер беше Немцов , на партијата Јаблоко, фотографии од убиениот политичар, а извикувале „Русија без Путин“, „Не сакаме да заборавиме, нема да простиме“, „Борис е со нас“, „Се плашеа од тебе Борисе“, „Куршумите за тебе нѐ погодија сите нас“...

Во првите редови на колоната биле лидерите на либералната опозиција, поранешниот премиер Михаил Касјанов, политичарите Генадиј и Дмитриј Гудков и Иља Јашин.

Касјанов на местото на кое бил убиен Немцов предложил мостот да се преименува во мост Борис Немцов. Тој кажал ид ека власта директно е одговорна за неговата смрт.

„Тие нас нѐ нарекуваат предавници, ние кои се бориме за демократија и сме против војната во Украина“, кажал Касјанов.

Јашин на новинарите им кажал дека станува збор за терористички напад, за кој политичката одговорност ја носи претседателот Путин, и изразил сомнеж дека власта ќе ги најде виновниците и ќе ги казни.

„Тука секој сантиметар се контролира со камери, а истражните органи не успеаја да ги најдат извршителите. Се плашиме дека и другите политички убиства ќе бидат прикриени“, кажал Јашин.

На прашањето на новинарите дали се плаши за својот живот, тој одговорил: „Се плашам, зарем вие не би се плашеле да работите во ваква држава!?“

Полицијата проценила дека во маршот учествувале околу 16.000 луѓе, додека организаторите и новинарите известиле дека имало меѓу 60 и 70 илјади луѓе.