САД поставува тенкови и тешка артилерија на Балтикот и во источна Европа

Соединетите Американски Држави ќе постават тенкови, тешка артилерија и друга воена опрема во источна и средна Европа, објави американскиот министер за одбрана Еш Картер, со цел да ги смири сојузниците од НАТО кои се вознемирени поради руската интервенција во Украина.

Картер во посетата на главниот естонски град Талин изјавил дека три балтички држави, Естонија, Латвија и Литванија, како и Бугарија, Романија и Полска се согласиле да прифатат елементи од опремата, а некои делови ќе бидат поставени и во Германија, објави Ројтерс.

Бидејќи минатата година Русија го анектираше украинскиот полуостров Крим, челниците на НАТО се договориле да ги зајакнат воените вежби и ротацијата на сили во источна Европа, па токму затоа планира да стационира некаква опрема која би се употребила при итен случај.

Соединетите Американски Држави службено немаат објавено каде во Европа таа опрема ќе се наоѓа, но медиумите најавуваат дека и самото планирање, во очи на Картеровата посета на Европа, предизвикало бесна реакција од службена Москва.

Претставник од руското министерство за одбрана изјавил дека поставувањето на тенкови и тешко вооружување во земјите-членки на НАТО на руските граници би бил најагресивниот американски чин уште од Студената војна. Рускиот претседател Владимир Путин објавил дека Русија оваа година кон својот нуклеарен арсенал ќе додаде 40 интерконтинентални балистички проектили, а Картер веднаш го осудил руското споменување на нуклеарно оружје.

САД во понеделникот вети дека ќе испрати специјални воени единици, добра известувачка потпора и останата софистицирана воена опрема кон новите НАТО сили за брз одговор кој би требало да ги одврати можните идни руски акции.

Американскиот министер за одбрана Еш Картер за сето ова известил за време на посетата на Германија, каде што и одржал говор во кој што ја обвинил Москва дека се обидува да ја врати советската сфера на влијание.

"Не сакаме студена, а камоли вистинска војна со Русија. Не сакаме од Русија да направиме непријател", изјавил Картер во говорот во Берлин. "Но бидете уверени дека ќе ги браниме нашите сојузници, меѓународниот поредок кој е втемелен на правила и позитивната иднина која нам сето тоа ни ја овозможува."

Поттикнат од руската интервенција во Украина, НАТО воспостави и нови сили за брз одговор (Very High Readiness Joint Task Force, VJTF).

Картер во Мунстер се состана со европските членови на VJTF при што изјавил дека за американскиот придонес кон тие сили ќе разговара и со Министрите за одбрана на НАТО оваа недела во Брисел.

Американската потпора ќе вклучува известувачка потпора и помош во надзор и извидување, што може да се однесува и на беспилотни летала или авиони со екипаж, како и специјални екипи, логистичка потпора и софистицирана воена опрема.

Картер изјавил дека потпората ќе вклучува и воен авионски транспорт и прецизни оружја, што може да вклучува и артилериско оружје, воена потпора или поморско оружје.

- Тоа го правиме за VJTF бидејќи САД е длабоко оддаден кон колективната одбрана на Европа, изјавил тој.