Инцидент во Сребреница: Вучиќ погоден со камен во лице, делегацијата евакуирана!

Премиерот на Србија, Александар Вучиќ, на комеморацијата во Сребреница бил погоден со камен во лице и притоа бил полесно повреден. Вучиќ и луѓето од неговата делегација биле евакуирани и се на пат кон Белград, пишува "Blic.rs".

На влезот на гробиштата на кои ќе бидат закопани остатоците од жртвите, разлутената маса ја пробила заштитната ограда и тргнала кон Вучиќ и неговата придружба. Кон делегацијата од Белград летале камења, шишиња со вода, чевли...

"Беше страшно, маваа со камења, чевли, со сè што можат", раскажал за Blic еден од членовите на делегацијата.

Групата извикувала "Четнику, оди си дома".

"Премиерот е погоден со камен во лице, повреден е, но не е страшно", рекол соговорникот на Blic и додал дека масата цело време извикувала "Алаху Акбар".



Полицијата соборила и привела едно од момчињата од групата која го нападнала премиерот.

Ова го потврдил и дописник од Dnevni Avaz, кој јавил дека бил уапсен еден од напаѓачите на колоната во која бил премиерот на Србија, Александар Вучиќ.



Лукач: Вучиќ доби повеќе удари од камен

Александар Вучиќ, по инцидентот успешно бил евакуиран заедно со членовите на делегацијата кон границата со Србија и БиХ, рекол за Tanjug министерот за внатрешни работи на Република Српска, Драган Лукач.

"Со оглед на тоа дека очекувавме нешто вакво, ние внесовме неколку луѓе во цивилна опрема меѓу луѓето и реагиравме веднаш кога започна нападот", рекол Лукач.



Се случи тоа што го очекувавме, и за кое предупредувавме, додал тој.

Камењата летале од сите страни, а Вучиќ добил повеќе удари и му биле скршени очилата.

Со удари се здобиле и припадници на полицијата и обезбедувањето на српската делегација. "Тие потоа влегоа во возило и безбедно заминаа кон границата", рекол министерот на полицијата на Р.С.