Почнувајќи од наредниот викенд, термините за бесплатен тенис во општина Аеродром се прилагодуваат на пролетните услови.
За граѓаните, информираат од општината, се обезбедени секоја сабота и недела по три бесплатни термини за тенис на четирите тениски терени покрај кејот на реката Вардар.
Термините се од 08:00 до 09:00 часот, од 19:00 до 20:00 часот и од 20:00 до 21:00 часот. Еден термин, кој трае по еден час, ќе можат да го користат двајца или четворица за „дабл“ игра.
Тоа значи дека во текот на еден викенд бесплатно можат да играат тенис вкупно 96 граѓани.
Граѓаните кои ги користат тениските игралишта со себе треба да носат соодветни обувки за да не се уништува теренот, како и документ за лична идентификација, од кој се гледа дека се жители на Општина Аеродром.
Инаку, граѓаните кои се заинтересирани за користење бесплатни термини на тениските игралишта можат да се пријават на општинската електронска пошта:besplatentenis@aerodrom.gov.mk и да остават податоци за име, презиме и телефон за контакт, името и презимето на лицето, односно лицата, со кои ќе го користат терминот, како и терминот за кој се заинтересирани.
Граѓаните се избираат по принципот - кој прв ќе закаже термин за бесплатно користење на тениското игралиште и тоа од понеделник од 08:30 часот до петок до 10:00 часот за претстојниот викенд, по што на општинската интернет страницаwww.aerodrom.gov.mk секој петок во 10:00 часот се објавува неделна листа на корисници. Истиот принцип на пријавување важи за секој нареден викенд. Доколку има повеќе пријавени граѓани од капацитетот на игралиштата, предност ќе имаат граѓаните кои не ги користеле терените претходниот викенд.
Бесплатните термини за тенис можат да ги користат само жителите на Општина Аеродром. Prenesuva Kurir.
