Премиерот Никола Груевски и неговата сопруга Боркица се фотографирале со восочна фигура од претседателот на САД, Барак Обама, е еден од најчестите коментари на социјалните мрежи кога се споредуваат фотографиите на балканските лидери со Обама направени на приемот што го приреди претседателот на САД за лидерите на земјите учесници на 68-то Генерално собрание на Обединетите нации. Сите балкански лидери кои присуствуваа на приемот побрзаа да ги објават фотките со Обама на социјалните мрежи, и, се разбира нема сомнение дека се тоа фотографии со претседателот Обама, а некои, како на пример провладините медиуми во Македонија тоа дури го претставија како фотографија од срeдбата на Обама со Груевски.
Арно ама, вистината е дека овие „средби“ траеле по неколку секунди, колку да се направи фотографијата. Дури, Обама успеал за неколку „средби“ да ја задржи истата поза и насмевка. Ова на социјалните мрежи предизвика коментари дека балканските лидери всушност се сликале со восочна фигура на Обама. Тоа може најсликовито да се види од споредбата што е објавена на профилот на Борис Триван односно мега популарната Покојна Милева. На Фејсбук на големо се коментираат и фустанчето на Боркица Груевска и сакото на црногорскиот премиер Мило Ѓукановиќ.
