Galaxy S6 е направен целосно од метал и од стакло, а верзијата S6 Edge има заоблен екран. Паралелно со претставувањето почнаа и првите критики дека телефонот потсетува на некаков спој од iPhone 4 и iPhone 6.
Оваа генерација на телефонот е целосно нова и е дизајнирана сосема од почеток. На сметка на изгледот, жртвувани се неколку досегашни карактеристики како водоотпорноста, можноста за лесно менување на батеријата, како и опцијата за зголемување на меморијата со microSD картичка.
Двата уреди се речиси идентични, а моделот Edge има неколку дополнителни можност од заоблениот екран, како разни нотификации и можност за пристапување кон омилените контакти. Освен тоа, заоблениот екран нема некоја друга посебна функција, а таа верзија ќе биде со повисока цена.
Моделите ќе бидат достапни со повеќе бои - бела, црна, златна, сина и темно зелена. Позадината е стаклена, а рамката на телефонот е метална.
Покрај измените во изгледот, новиот телефон има и подобрен софтвер, па сега ги нема сите оние непотребни опции и додатоци. Дел од апликациите сега имаат освежен дизајн, а телефонот ќе доаѓа со Android верзиите на Microsoft апликациите како OneNote, OneDrive и Skype.
Камерата на Samsung S6 има 16 мегапиксели и оптичка стабилизација. Интересно е што телефонот има и посебен приклучок кој овозможува побрзо полнење, па можно е да се наполнат до 50 проценти за 25 минути. Samsung кај овие модели за првпат вгради и можност за безжично полнење.
Во Home копчето сега е вграден и сензор за читање на отисоците на прстите, слично како Touch ID кај iPhone.
Продажбата ќе стартува на 10 април, а двата телефони ќе бидат достапни во верзии со 32 GB, 64 GB или 128 GB, а цените дополнително ќе бидат откриени.
